الإيصالات وتقفيل الخزنة آخر اليوم

كل دفعة بتتسجل في السنتر بتاخد رقم إيصال لوحدها. وآخر اليوم كل مساعد يفتح «تقفيل الخزنة» ويكتب الكاش اللي معاه فعلًا، والمنصة تقارنه باللي هو سجّله وتقوله «مظبوطة» أو «زيادة» أو «عجز». بعدها المدرس يشوفها ويأكّدها.

أرقام الإيصالات

• أول ما الدفعة تتسجل بتاخد رقم: 1، 2، 3… على المنصة كلها، مهما كان مين اللي استلم.
• الرقم بيظهر في رسالة الدفع («استلمت … · إيصال 15»)، وفي ورقة الطالب في «التحصيل الشهري» («إيصال 15»)، وجنب كل دفعة في «تقفيل الخزنة» (#15)، وفي ملف «إكسيل» بتاع الشهر.
• الدفعة اللي اتلغت بتفضل محتفظة برقمها، ورقمها مبيتديش لحد تاني. كده أي ورقة في إيد ولي أمر ليها رقم واحد بس.

تقفيل الخزنة (للمساعد)

1. افتح «الفلوس والتحصيل» ← «التحصيل الشهري».

2. دوس «تقفيل الخزنة». هتلاقي اللي استلمته النهارده: «كاش» و«تحويل» وعدد «دفعات»، وتحتهم كل دفعة برقم إيصالها ووقتها.

   

3. عدّ الفلوس اللي في إيدك واكتبها في «الكاش اللي معاك فعلاً».

4. بص على «الفرق:»: «مظبوطة»، أو «زيادة …»، أو «عجز …».

5. لو في فرق اكتب السبب في «ملاحظة (اختياري)».

6. دوس «قفّل الخزنة». هيظهر «الخزنة اتقفلت · مستني تأكيد المدرس».

تأكيد الخزن (للمدرس)

1. من «التحصيل الشهري» دوس «تقفيل الخزنة» واختار «خزن الفريق».

2. فوق هتلاقي «أيام لسه متقفلتش» لو في مساعد مقفلش يومه.

3. كل تقفيل مكتوب فيه «السيستم … · عدّ …» والفرق والملاحظة.

4. دوس «أكّد» لو تمام، أو «افتح اليوم» واكتب السبب لو المساعد محتاج يصلّح حاجة.

   

5. لما يبقى في تقفيل مستني، هيظهرلك كمان في «تنبيهات» جوه «التحصيل الشهري».

حاجات مهمة

• الحساب بيعتمد على الدفعات اللي المساعد نفسه استلمها في اليوم ده بتوقيت القاهرة. «تحويل» بيظهر لوحده ومش داخل في الكاش.
• بعد التقفيل المساعد مش هيقدر يسجّل أو يلغي دفعات اليوم ده. لو المدرس فتح اليوم، المساعد هيشوف سبب الفتح ويقفل تاني.
• الدفعات اللي اتسجلت من غير نت قبل التقفيل واتبعتت بعده بتتقبل، وبتظهر «اتسجل بعد التقفيل». شوف تسجيل الحضور من غير إنترنت.
• المساعد بيشوف «في درجك النهارده» في الصفحة الرئيسية، والمدرس بيشوف «اتحصّل النهارده» لكل الفريق.
• أي دفعة بتتلغي محتاجة سبب، والمدرس بيشوفها في «تنبيهات» ← «الدفعات اللي اتلغت» ومعاها رقم إيصالها.

لو حصلت مشكلة

• «اكتب الفلوس اللي عدّيتها»: خانة الكاش فاضية.
• «إنت قفلت خزنة اليوم ده. لو محتاج تسجّل دفعة، اطلب من المدرس يفتح اليوم.»: المدرس يدوس «افتح اليوم» من «خزن الفريق».
• «إنت قفلت خزنة اليوم ده. المدرس بس اللي يقدر يلغي الدفعة دلوقتي.»: الإلغاء بعد التقفيل للمدرس بس.

اقرا كمان: التحصيل الشهري والأدوار والصلاحيات.