تسجيل الحضور بالـ QR من موبايل المساعد

الحضور بالـ QR في دَرّب بيمشي كده: الطالب يفتح «كود الحضور» على موبايله، والمساعد يفتح «حصة النهارده» ويدوس «امسح كروت الحضور» ويوجّه كاميرا موبايله على الكود. الكود بيتغيّر كل 30 ثانية، فصورته متنفعش لحد تاني.

قبل ما تبدأ

• لازم المجموعة تكون موجودة والطلاب متضافين فيها. شوف إنشاء مجموعة في السنتر.
• اللي بيسجّل الحضور: المدرس، أو أي حد في الفريق عنده صلاحية الحضور (المساعد بيشوف مجموعاته بس).
• أول مرة الموبايل هيسألك تسمح للمتصفح أو التطبيق باستخدام الكاميرا. وافق.

عند الطالب

1. الطالب يفتح منصتك ويدوس «كود الحضور» من الصفحة الرئيسية (أو من «حسابي» ← «كود الحضور في السنتر»).

2. يورّي الكود للمساعد. تحت الكود مكتوب «بيتجدد خلال … ثانية»، والكود بيتغيّر لوحده.

   الشرح الكامل للطالب في كود الحضور عند الطالب.

عند المساعد

1. افتح «المجموعات»، ودوس «حصة النهارده» على كارت المجموعة (أو افتح الحصة من «النهارده» في الصفحة الرئيسية).

2. دوس «امسح كروت الحضور». الكاميرا الخلفية هتفتح.

   

3. وجّه الكاميرا على كود الطالب. الموبايل هيهز، وهيظهر سطر زي «اتسجل حضور يوسف أحمد».

4. لو الطالب لسه مدفعش الفترة دي هيتكتب جنبه «· لسه مدفعش»، فتقدر تحصّل منه على طول.

5. كمّل مع الطالب اللي بعده من غير ما تقفل الكاميرا. لما تخلص دوس «اقفل الكاميرا».

6. اللي معهوش موبايل: دوس على اسمه في القايمة («اضغط لما ييجي»)، وهيتسجل «حضر».

   

حاجات مهمة

• الطالب بيتسجل مرة واحدة في الحصة. لو اتمسح تاني هيظهر «متسجل حضوره قبل كده».
• لو مسحت طالب مش في المجموعة دي، الحضور بيتسجل ويتكتب «(مش في المجموعة دي)»، وبيظهر تحت «زوار حضروا النهارده».
• تسجيل الحضور بيتقبل من قبل ميعاد الحصة بساعة. قبل كده هيسألك «الحصة لسه مبدأتش» وتقدر تدوس «سجّل برضه» لو دي حصة زيادة أو اتنقلت.
• لو دوست على طالب بالغلط، دوس على اسمه تاني وهيتشال من الحضور.
• مش لازم نت عند المساعد: شوف تسجيل الحضور من غير إنترنت.
• من صفحة المجموعة ← تبويب «الحضور» تقدر تشوف «حضر النهارده» و«آخر الحصص»، وتنزّل «نزّل حضور الشهر» Excel.

لو حصلت مشكلة

• «الكود ده قديم أو مش صحيح. خلّي الطالب يفتح الكود من موبايله دلوقتي.»: الطالب فاتح صورة قديمة أو الصفحة واقفة. خليه يفتح «كود الحضور» من جديد.
• «مش قادرين نفتح الكاميرا. اسمح للمتصفح باستخدامها، أو سجّل الطالب بالاسم تحت.»: افتح إعدادات المتصفح واسمح بالكاميرا للموقع، أو سجّل بالاسم.
• الطالب شايف «مقدرناش نجيب الكود، اتأكد من النت.»: موبايله محتاج نت عشان الكود يظهر. سجّله بالاسم.
• «المجموعة دي مش ميعادها النهارده»: ده تنبيه بس. لو في حصة زيادة سجّل الحضور عادي.

ولو لسه بتقارن بين الورق والـ Excel والكيو آر: برنامج حضور وغياب الطلاب.