تسجيل الحضور من غير إنترنت

لو النت قاطع في السنتر، كمّل شغلك عادي من شاشة «حصة النهارده». كل حضور (بالكود أو بالاسم) وكل دفعة بتتحفظ على موبايل المساعد، وتتبعت للمنصة لوحدها أول ما النت يرجع، ومن غير ما حاجة تتسجل مرتين.

قبل ما تبدأ

• افتح «حصة النهارده» للمجموعة مرة واحدة وإنت على نت قبل ما تروح السنتر (أو في أول اليوم). الشاشة بتفضل محفوظة على الموبايل وبتفتح من غير نت بعد كده.
• لو فتحت شاشة عمرك ما فتحتها على الموبايل ده والنت قاطع، هيظهرلك «مفيش إنترنت دلوقتي» و«الصفحة دي محتاجة نت أول مرة تفتحها».
• الشغل من غير نت بيشتغل في شاشة «حصة النهارده» وتبويبات «الحضور» و«الفلوس» في صفحة المجموعة، وفي «التحصيل الشهري». صفحة «الحضور» اللي في القايمة («حضور السنتر») محتاجة نت.

الخطوات

1. افتح «المجموعات» ← «حصة النهارده». فوق على اليمين هتلاقي «من غير نت» بلون أصفر بدل «متصل».

   

2. سجّل الحضور زي العادي: «امسح كروت الحضور» أو دوس على اسم الطالب. هتشوف «… محفوظ على الجهاز».

3. حصّل الفلوس زي العادي من «حصّل» ← «استلمت». هيظهر «استلمت … · محفوظ على الجهاز، والشهر هيتفتحله أونلاين أول ما النت يرجع».

4. الطالب اللي لسه متبعتش هيظهر في القايمة بعلامة ساعة صغيرة و«محفوظ على الجهاز».

   

5. أول ما النت يرجع، الحاجات بتتبعت لوحدها. لو عايز تبعتها بنفسك دوس «ابعت» في الكارت الأصفر.

6. لما تتبعت هيظهر «اتبعت …» والكارت الأصفر هيختفي. لو لسه مفيش نت هيظهر «لسه مفيش نت. هنبعتها لوحدنا أول ما يرجع.»

حاجات مهمة

• كل عملية ليها رقم خاص بيها، فلو اتبعتت مرتين (نت فاصل، تابين مفتوحين) بتتسجل مرة واحدة بس.
• كود الطالب بيتراجع على الوقت اللي اتمسح فيه، فبيتقبل حتى لو اتبعت بعد ساعات. الحضور كمان بيتسجل بوقته الحقيقي، والدفعة بتاريخها الحقيقي.
• الحاجات المستنية محفوظة على الموبايل ده بس، ولحسابك على المنصة دي. متمسحش بيانات المتصفح، ومتدخلش بحساب تاني على نفس الموبايل قبل ما تتبعت.
• لو دوست على طالب بالغلط وهو لسه على الجهاز، دوس عليه تاني وهيتشال من الجهاز على طول.
• لو قفلت خزنتك وبعدين اتبعتت دفعة كانت متسجلة قبل التقفيل، بتتقبل وبتظهر في التقفيل «اتسجل بعد التقفيل». شوف الإيصالات وتقفيل الخزنة.
• الحاجات اللي محتاجة نت فعلًا: عمل مجموعة أو تعديلها، «اربط» حصة النهارده بحصة من الكورس، وظهور «كود الحضور» على موبايل الطالب.

لو حصلت مشكلة

• سطر أحمر في الكارت الأصفر زي «حضور فلان: …»: ده معناه إن المنصة رفضت العملية، والسبب مكتوب جنبها (مثلاً «الحاجة دي مش من صلاحياتك.» أو «لوحتك دلوقتي للعرض بس لحد ما تجدد الباقة.»). العملية دي مش هتتبعت تاني.
• «السيرفر مش متاح دلوقتي»: المشكلة مش عندك. هنحاول نبعتها تاني لوحدنا كام مرة.
• «الحصة لسه مبدأتش»: الحضور اتسجل قبل ميعاد الحصة بأكتر من ساعة. سجّله تاني وإنت على نت ودوس «سجّل برضه».
• الطالب مش قادر يفتح «كود الحضور» لأن موبايله من غير نت: سجّله بالاسم.

اقرا كمان: تسجيل الحضور بالـ QR من موبايل المساعد والتحصيل الشهري.