دخول الطالب برقم الموبايل

الطالب بيدخل منصة مدرسه على دَرّب برقم موبايله وكود بيوصله في رسالة SMS، من غير باسورد. أول مرة بيكتب اسمه وسنته الدراسية، وبعد كده الدخول بيبقى رقم وكود بس.

قبل ما تبدأ

• خلي معاك لينك منصة مدرسك. المدرس بيبعته في جروب الواتساب أو تلاقيه في السنتر.
• الرقم لازم يكون موبايل مصري: 11 رقم بيبدأ بـ 01.

الخطوات

1. افتح لينك منصة مدرسك.

2. دوس «ادخل».

3. هتطلعلك «ادخل برقم موبايلك». اكتب رقمك ودوس «ابعتلي الكود».

   

4. في «اكتب الكود» اكتب الكود اللي جالك في الرسالة (6 أرقام).

5. لو ليك حساب قبل كده، هتلاقي «أهلاً تاني يا ...» و«دخلت على طول». دوس «ادخل لوحتك ←».

6. لو دي أول مرة، هتلاقي «أهلاً بيك! عرّفنا بنفسك». اكتب اسمك بالكامل (اسمك واسم والدك على الأقل).

7. اختار سنتك من «إنت في سنة كام؟»، و«الشعبة» لو ظهرت.

8. في «هتحضر فين؟» اختار «أونلاين من البيت» أو مجموعة السنتر بتاعتك، ودوس «كمّل».

   

9. هتسألك «هتدفع إزاي؟». لو مش عايز تشترك دلوقتي دوس «بعدين»، أو كمّل الدفع زي ما في الطالب يدفع أو يشحن كود.

10. دوس «ادخل لوحتك ←».

لو دخلت من صفحة الدخول على طول

لو فتحت صفحة الدخول بدل صفحة المدرس، الشاشة بتقول «أهلاً بيك في» واسم المنصة، والخطوات هي هي: الرقم، «ابعتلي الكود»، الكود. الطالب الجديد بيلاقي «أهلاً بيك! 👋» بالاسم والسنة وزرار «يلا نبدأ».

لو بتذاكر مع أكتر من مدرس

رقمك واحد في دَرّب كله، فمش محتاج حساب جديد لكل مدرس.

1. من لينك أي مدرس، ادخل بنفس الرقم والخطوات اللي فوق.
2. لو دخلت من صفحة دخول دَرّب الرئيسية (مش لينك مدرس)، بعد الكود هتلاقي «هتدخل على مين؟» وفيها كل المنصات اللي رقمك عليها. دوس على المدرس اللي عايزه.
3. عشان تبدّل بعدين، افتح «حسابي» ودوس الكارت «مدرسينك» («بدّل بينهم من غير كود»).

لو ظهرلك «الجهاز ده جديد»

ده معناه إن المدرس مخلّي الحساب يفتح من عدد أجهزة محدد، وحسابك مفتوح على جهاز تاني.

1. دوس «ابعت الطلب».
2. استنى المدرس يوافق.
3. دوس «المدرس وافق؟ ادخل تاني». الجهاز القديم هيخرج لوحده.

التفاصيل من ناحية المدرس في أجهزة الطالب.

حاجات مهمة

• متدّيش الكود لحد. محدش من دَرّب أو من المدرس هيطلبه منك.
• اسمك وسنتك بيوصلوا للمدرس. تغيير الصف أو الشعبة بعد كده بيبقى عن طريق المدرس.
• رقم ولي الأمر بيضيفه المدرس، وبعدها ولي الأمر يقدر يتابعك من موبايله.
• لو سجّلت خروج، هتحتاج تدخل برقم موبايلك والكود تاني.
• ممكن تذاكر من تطبيق دَرّب بنفس الرقم.

لو حصلت مشكلة

• «اكتب رقم موبايل مصري: 11 رقم بيبدأ بـ 01»: الرقم ناقص أو مش مصري. لو رقمك مش مصري دوس «رقمك مش مصري أو بتدخل بالإيميل؟».
• «الكود غلط، جرّب تاني.»: اكتبه تاني، أو اطلب كود جديد بعد ما العداد يخلص.
• «مفيش حساب بالرقم ده لسه»: انت دخلت من موقع دَرّب الرئيسي ومش مسجّل عند أي مدرس. ادخل من لينك منصة مدرسك، وهتسجّل برقمك على طول. الطريقة كاملة في إزاي الطالب يشترك في منصتك.
• «اكتب اسمك الأول واسم والدك على الأقل»: الاسم لازم يكون كلمتين أو أكتر.
• «المتصفح ده مش بيحفظ تسجيل الدخول (وضع التصفح الخفي؟)»: افتح المنصة من متصفح عادي.