أجهزة الطالب: جهاز واحد لكل طالب

عشان الحساب الواحد ميتفتحش لكذا طالب، تقدر تحدد كل طالب يفتح حسابه من كام جهاز. من «أجهزة الطلاب» تختار «أي جهاز» أو «موبايل واحد» أو «موبايل + كمبيوتر»، وتختار هل الطالب يغيّر جهازه بنفسه مرة كل 30 يوم ولا يبعتلك طلب توافق عليه.

قبل ما تبدأ

• الإعداد ده للمدرس صاحب المنصة بس.
• من الأول القاعدة على «أي جهاز»، يعني مفيش حد لحد ما تغيّرها.
• أعضاء فريقك مش بيتقيدوا بالقاعدة دي.

الخطوات

1. افتح «الإعدادات».

2. في قسم «الطلاب» دوس «أجهزة الطلاب». هتفتح صفحة اسمها «أمان الطلاب».

3. في «الطالب يفتح من:» اختار:

   • «أي جهاز»: من غير حد.
   • «موبايل واحد»: جهاز واحد بس.
   • «موبايل + كمبيوتر»: موبايل واحد وكمبيوتر واحد.

4. في «يغيّر جهازه بنفسه:» اختار:

   • «مرة كل 30 يوم»: الطالب يفتح من جهاز جديد بنفسه، والقديم بيخرج، وإنت بتشوف التغيير.
   • «لا، لازم موافقتي»: بيبعتلك طلب وإنت توافق أو ترفض.

   

5. دوس «احفظ». الطلاب اللي فاتحين من أجهزة زيادة هيخرجوا منها.

لما الطالب يفتح من جهاز تاني

1. الطالب هيظهرله: «حسابك مفتوح على جهاز تاني. ابعت طلب للمدرس يفتحلك الجهاز ده».

2. يدوس «ابعت الطلب».

3. عندك في «أجهزة الطلاب» هيظهر قسم «طلبات أجهزة جديدة» فيه اسم الطالب ونوع الجهاز.

4. دوس «وافق» أو «ارفض». لما توافق، الجهاز الجديد بيتفتح والقديم بيخرج لوحده.

5. الطالب يدوس «المدرس وافق؟ ادخل تاني».

   

فك ربط أجهزة طالب

لو الطالب غيّر موبايله أو اتسرق:

1. من «كل الطلاب» افتح قايمة الخيارات جنب الطالب واختار «فك ربط الأجهزة»، أو من ملفه افتح تاب «الأجهزة» ودوس «فك الربط».
2. أكّد بـ «فك الربط».
3. الطالب بيخرج من كل أجهزته، وأول جهاز يدخل منه بعد كده بيتربط بحسابه.

حاجات مهمة

• في التطبيق، الحساب بيتربط بالموبايل نفسه.
• في المتصفح، الجهاز بيتعرف من رقم بيتحفظ في المتصفح. لو الطالب مسح بيانات المتصفح أو فتح من متصفح تاني على نفس الموبايل، غالبًا دَرّب بيعرف إنه نفس الجهاز ويدخله من غير طلب (لحد 3 مرات في 30 يوم)، وهتشوف ده في «آخر التغييرات». ده مش مضمون 100%.
• «آخر التغييرات» فيها الطلاب اللي غيّروا أجهزتهم وردودك على الطلبات في آخر 30 يوم.
• كل تغيير في القاعدة، وكل موافقة أو رفض أو فك ربط، بيتسجل في سجل العمليات.
• حد الأجهزة بيكمّل حماية الفيديوهات: الحماية مالهاش لازمة لو 5 طلاب على حساب واحد.

لو حصلت مشكلة

• الطالب بيقول «حسابك مفتوح على جهاز تاني»: شوف طلبه في «طلبات أجهزة جديدة» ووافق، أو فك ربط أجهزته.
• الطالب بعت الطلب ولسه مش داخل: بعد ما توافق، يدوس «المدرس وافق؟ ادخل تاني».
• «حدّث الصفحة وجرّب تاني.»: المتصفح مبعتش رقم الجهاز. الطالب يحدّث الصفحة.
• اختيارات «يغيّر جهازه بنفسه:» باهتة: لأنك مختار «أي جهاز». اختار «موبايل واحد» أو «موبايل + كمبيوتر» الأول.