إنشاء كورس جديد على منصتك

عشان تعمل كورس جديد على دَرّب: افتح «الكورسات والامتحانات» ← «الكورسات»، ودوس «كورس جديد». بتكتب 3 حاجات بس (الاسم والصف وسعر الشهر أونلاين)، والكورس بيتعمل على طول وتبدأ تضيف فيه الحصص.

الكورس في دَرّب مش "نوع" واحد. أي كورس ممكن يكون فيه فيديوهات وملازم PDF وحصص لايف وامتحانات مع بعض، ونفس الكورس بيخدم طلاب السنتر وطلاب الأونلاين.

قبل ما تبدأ

• لازم تكون المدرس صاحب المنصة أو «مدرس مساعد». المساعد مش بيشوف زرار «كورس جديد».
• لو عايز تختار الصف، لازم تكون صفوفك متحددة في «الإعدادات». لو مفيش صفوف، خانة الصف مش هتظهر.

الخطوات

1. من القايمة افتح «الكورسات والامتحانات» ← «الكورسات».

2. دوس «كورس جديد».

   

3. في «اسم الكورس» اكتب اسم واضح، مثلًا «فيزياء 3 ثانوي».

4. من «الصف» اختار الصف.

5. في «سعر الشهر أونلاين» اكتب السعر بالجنيه. لو الكورس مجاني، شغّل «ببلاش».

6. دوس «اعمل الكورس».

   

7. هتظهر رسالة «الكورس اتعمل»، وصفحة الكورس هتفتح على تبويب «الحصص». الشهر الحالي بيبقى جاهز فيه علشان تضيف أول حصة على طول.

كمّل بيانات الكورس

صفحة الكورس فيها 4 تبويبات: «الحصص» و«الطلاب» و«البيع والأسعار» و«الإعدادات» (على الموبايل اسمهم «البيع» و«الضبط»).

1. افتح تبويب «الإعدادات».

2. في «تعريف الكورس» راجع الاسم، وارفع «الصورة التعريفية (Thumbnail)».

3. اكتب «الوصف المختصر»، وده اللي بيظهر في كارت الكورس.

4. في «الصف والمادة» اختار «الصف الدراسي» و«الشعبة» و«المادة». الطلاب بيشوفوا الكورس على حسب صفهم.

5. لو حابب، افتح «الطالب هيتعلم إيه؟ ومين الكورس ده ليه؟ (اختياري)» واكتب أهداف الكورس.

6. دوس «حفظ».

   

انشر الكورس وابعت لينكه

1. ضيف حصة واحدة على الأقل من تبويب «الحصص» (إزاي تضيف حصة).
2. دوس «انشر الكورس». هتظهر رسالة «الكورس اتنشر، والطلبة يقدروا يشوفوه دلوقتي».
3. دوس «ابعت لينك الكورس» وشاركه على واتساب أو انسخه.

حاجات مهمة

• فوق كل تبويبات الكورس فيه 4 أرقام: «الطلاب» و«اتحصّل الشهر ده» و«بيتفرجوا» و«محتاجين متابعة». دوس على أي رقم يفتحلك تفاصيله.
• «حفظ» مش بيغيّر حالة الكورس: المنشور يفضل منشور، والمسودة تفضل مسودة.
• لو قلت في إعداد لوحتك إنك مش بتبيع أونلاين، الكورس الجديد بيبقى «لطلاب المجموعات بس» لحد ما تشغّل البيع (بيع الكورس أونلاين).
• «حذف الكورس» من قايمة الكارت بيشيل الكورس بحصصه، والطلاب المشتركين مش هيشوفوه تاني. الحذف مبيرجعش.

لو حصلت مشكلة

• «اكتب اسم الكورس.»: الاسم لازم يبقى حرفين على الأقل.
• «اختار الصف.»: عندك صفوف متحددة ولازم تختار واحد منها.
• «اكتب سعر الشهر أونلاين، أو خليه ببلاش.»: اكتب رقم أكبر من صفر، أو شغّل «ببلاش».
• «الكورس لسه مسودة. انشره الأول علشان تشاركه.»: انشر الكورس الأول وبعدين انسخ اللينك.
• «الكورس اتحفظ مسودة: ضيف حصة واحدة على الأقل علشان تنشره.»: ضيف حصة وبعدين دوس «انشر الكورس».

بعد كده: الشهور والأبواب: مين يشوف إيه. ولو لسه بتفكر تبدأ منصتك، اقرا إزاي تعمل منصة تعليمية.